മായാലോകം

 

മായാലോകം

 

നാരായണക്കിളി നാടുവിട്ടോ?

നാട്ടിലെ കോട്ടകൾ പോയ്മറഞ്ഞോ?

നാരകം താനെ ചിതലരിച്ചോ?

നീലാംബരി ദൂരെ തേങ്ങുകയോ?

 

കണ്ടവർ കണ്ടവർ കണ്ണുപൊത്തും വിധം

കാലം കടും കാടതയാർന്നിടുന്നു,

കേട്ടവർ കേട്ടവർ കേൾവിപോക്കും വിധം

കൂവിപ്പൊളിച്ചതാ കാലം ഓടി.

 

ചഞ്ചലാക്ഷിക്കിതാ ചാഞ്ചല്യമേറുന്നു

ചക്കി-ചങ്കരന്മാർ വേർപിരിഞ്ഞു,

ചേലയിൽ പൂമണം ഏൽക്കാതെയാകുന്നു

ചക്കയും ചുക്കും ഒന്നാകുന്നു.

 

സിംഹങ്ങൾ പൂച്ചയായ് കേഴുന്നതു കണ്ട്

സംസ്കാരം തെല്ലൊന്ന് മാറിനിന്നു,

സംസ്‌കൃതി ആഴ്ചയിൽ ഒന്നായ് ചുരുങ്ങുന്നു

സാരാംശം എന്നത് ദു:സ്വപ്നമായ്.

 

മച്ചിൻ പുരയില്ല, മാമ്പൂ വിരിഞ്ഞില്ല

മന്ത്രാലയങ്ങളിൽ മന്ത്രിയില്ല,

മര്യാദ മര്യാദ വിട്ടു പുലമ്പുന്നു

മായയാൽ സർവ്വതും മറച്ചീടുന്നു.

 

വാചാലനാകാതെ വാഗ്മിയായീടണം

വേണ്ടുംവിധം വേല ചെയ്‌തീടണം,

വാക്കുകൾ നന്മ നിറഞ്ഞതായീടണം

വിഡ്ഢിവേഷങ്ങൾ ഒഴിവാക്കണം.

  

                 അഞ്ജലി എം